Әзер җаваплар

- Алып җибәр!

- Алырга акчаның күзенә ак төшкән әле.

- Арыдым.

- Арсаң ат ялла, үзең җәяү бар.

- Ач!

- Ач булсаң, туеп кил.

- Ачуым килә.

- Ачуың килсә, борыныңны тешлә.

- Ачуым килә.

- Синең ачуың, минем аякчуым.

- Ашаган җиренә сыер да кайта.

- Кайтуын кайта да, аның сөтен савып калалар шул.

- Әү!

- Авызың дәү.

- Барыбер.

- Барыбер булса, ишектән йөрми тәрәзәдән йөрерләр иде.

- Беләм.

- Белүен беләсең дә, кыңгыр сибәсең.

- Беләм.

- Син белгәнне без белгән, калганын чөйгә элгән.

- Беләм.

- Син белгәнне мин чабата башына элгән.

- Беләм.

- Син белгәнне мин чормага меңгереп элгән.

- Беләм.

- Син белгәнне мин белеп оныткан.

- Беләм.

- Үзең беләсең, эт күк өрәсең.

- Буе кечкенә.

- Буй белән Агыйдел буйлыйсы юк әле.

- Бәхил түгел.

- Бәхилең бәке астына, үзең сәке астына.

- Гафу ит.

- Гафуың белән сату ит.

- Гыйшык.

- Гыйшыгын гыйшык та, бишмәт тишек.

- Егылам.

- Егылсаң, җирдән түбән китмәссең.

- Елый.

- Еласа, кашы-күзе кара булыр.

- Җүләр!

- Иманаңны кем түләр.

- Иренәм.

- Иренгәнне тиз иргә бирәләр.

- Иртә бит әле.

- Иртә булса, соң булмаска әйбәт булыр.

- Иртәгә.

- Иртәгә үз киявем дә килә.

- Ишетерләр.

- Ишетмәгәйләре тагын. Күз күрер өчен, колак ишетер өчен бирелгән.

- Кечкенә бит.

- Тиресен текмәгән, үсәр әле.

- Килешми.

- Килешкәне килендә.

- Килешми.

- Килешкәне килешкәч.

- Китә.

- Киткән китсен, җәһәннәмгә тикле юл ачык.

- Китәм.

- Китсәң, килгән юлыңа киртә кормаган.

- Китәм.

- Китсәң, килгән юлыңа юкә үсмәгән.

- Кулымны кисәргә бирәм.

- Кулыңны түгел, башыңны кистерсәң дә ышанмыйм.

- Куркам.

- Курыкма, бүре түгел - ашамас.

- Кызык.

- Бер табак сызык.

- Көнләшәм.

- Көнләшкән көндәшлеккә барсын.

- Күз тияр.

- Аңа ике күз тигән инде, бүтән күз тимәс.

- Мин синнән элек туган!

- Син элек тусаң, мин белеп туган.

- Мин үзем дә белекле.

- Белеклесен белекле дә, борын астың җелекле.

- Минем сүз өскә чыкты.

- Сүзең өскә чыкты: һавада очып йөри, үзең генә аста калдың.

- Озак!

- Тиз тумагансыңдыр әле.

- Озатыйм!

- Рәхмәт, үзем генә озаермын.

- Оялам.

- Өй алырга, монДа өй сатучы юк әле.

- Оят!

- Өй ат булса, күптән җигеп китәр идек.

- Оят!

- Өй-ат Мәкәрҗәдә кыйбат, барып алырга ерак.

- Сәлам!

- Саламыңа печән.

- Телең корыр!

- Минем телем болай да бик коры, селәгәем агып тормый.

- Тизрәк йөр!

- Оча белмим инде, аяк белән йөрим.

- Туйдым.

- Туйсаң тәүбә кыл.

- Уңган.

- Уңганның койрыгы туңган.

- Уф, алла!

- Арсаң ат ялла.

- Үпкәләгән.

- Үпкәләгәнгә үпкә ашаталар.

- Үпкәләгән.

- Үпкәләгәннең өенә барыш.

- Үпкәләгән.

- Үпкәләсә, мәче үпкәсе ашасын.

- Үпкәләгән.

- Үпкәләсә, үпкәсе бавырыннан ерак китмәс әле.

- Хуш!

- Сөйләшкәндә безне дә куш.

- Ышанмыйм.

- Ышанмасаң, үзең карган.

- Юк.

- Юкка мин үзем дә тук.

- Язык булыр.

- Язык казык башына.

- Язык!

- Язык казык башында, җырлап торчы каршымда.

- Ярамый.

- Ярамаган - дөньяга яралмаган.

- Ярамый.

- Ярамаса, юынырсың.

- Ярар!

- Ярасы юк, ярылган да, ямалган да.

- Яхшылык итмәкче була.

- Яхшылыгы - яхшы ат түгелдер әле, атланып алмассың.

 Аңладыңмы?

- Аңлавын аңладым, төшенә генә алмадым.

- Ә мин нишлим?

- Ни теләсәң, шуны эшлә, тешең булса, телең тешлә.

- Белдеңме?

- Белдем, колагыма элдем, берсеннән керде, берсеннән чыгып китте.

- Булдымы?

- Булды дигәндә койрыгын борды.

- Бушлаймы?

- Бушлай сыер гына мышнай.

- Бүген ничәсе?

- Кадер кичәсе.

- Бүген ялдамы әллә?

- Ялда да, койрыкта да.

- Дәлеше?

- Дәлеше кабак бәлеше.

- Иеме?

- Ие, иемәсәң бие.

- Исәнме?

- Исән булмасам, әллә син врачмы?

- Исәнме?

- Ә үзең   кисәүме?

- Ишетмәдем, ни дисең?

- Базарда колак саталар, ди. Барып ал дим.

- Кайда?

- Былтыргы кар астында.

- Кайда?

- Каербидә.

- Кайдан килдең?

- Кайдырмый тау астыннан.

- Кайчан?

- Бозау агачка арты белән менгәндә.

- Кайчан?

- Карт алаша тай булганда.

- Кайчан?

- Качкан көнне иртән.

- Кайчан?

- Качып барганда.

- Кайчан?

- Кояш тискәре яктан чыкканда.

- Кайчан?

- Кызыл кар яугач.

- Кайчан?

- Дөянең койрыгы кайчан җиргә тияр, шунда.

- Кайчан?

- Язган булса яз көне, кушкан булса кыш көне.

- Кайчангача?

- Яз сорамаска, көз түләмәскә.

- Картаюлар ничек?

- Карт аю урманда гына була ул.

- Кая барасың?

- Каен башына.

- Кая барасың?

- Каерып салырга.

- Кая бардың?

- Кайманга - катык ашарга.

- Кая бардың?

- Эт туена кода булып бардым.

- Кем?

- Каян белим, кулын куеп китмәгән.

- Кем?

- Кем дигәннең кече улы.

- Кем?

- Кем дигәннең үзе, маңгаенда ике күзе.

- Кем малае син?

- Кемән улы Кемәнетдин малае.

- Кыйммәтме?

- Акча белән башма-баш.

- Мәгънәсе?

- Мәгънәсе - капка баганасы.

- Ни булган?

- Пешкән шалкан чи булган.

- Ни хак?

- Хак ярым хак, пот ярым борчак, бер кием чабата, калганы акчалата.

- Нигә карыйсың?

- Күңелемә ярыйсың.

- Ник?

- Син ни әйтер икән дип.

- Ник чәй эчмисең?

- Чәй белән кытай битен юа, ди.

- Нихәл?

- Сине күргәч, бетте хәл.

- Нихәл?

- Хәл иминлек, акча меңлек, алыштырырга вак юк.

- Нихәл?

- Хәл йөзгә җитә, кул тезгә җитә.

- Нихәл?

- Хәл хәер, ярлы баер, бай бөләр, иманасын кем түләр?

- Ни хәл?

- Шөкер дигән көн бар, бер салмалык он бар.

- Нихәл?

- Хәл хәлвәт, киндер күлмәк, ыштан бурлат, киткәннәр урлап.

- Нихәл?

- Юк шөкергә тук шөкер.

- Ничек эшләр?

- Эшләр - шак-шок итә тешләр.

- Нишли?

- Ат булып кешни, сыер булып мөгри.

- Нишли?

- Тире җыеп күн эшли.

- Нишлисең?

- Дуңгыз дагалыйм.

- Нишләп?

- Шулай шәп.

- Нишләп яту?

- Тик яту белән бик тату.

- Нәрсә?

- Тозлы кыяр-кәбестә.

- Оялмыйсыңмы?

- Өй алып, мунча сатканым юк.

- Саумысыз?

- Сау булмасак,  әллә баш очыбызда ясин чыкмакчы буласызмы?

- Сәбәбе?

- Сәбәбе - карабодай сәнәге.

- Сәгать ничә?

- Кичәгечә.

- Сиңа ничә яшь?

- Яшьне ат базарында гына сорыйлар.

- Сөенчесенә ни?

- Сөенчесенә уң колагың үзеңә.

- Сөйгәнең кем?

- Койрыклы җен, үземә әрәм, кешегә хәрам.

- Суны нигә күп ташыйсыз?

- Киптерәбез.

- Туйганыңны кайдан беләсең?

- Син күземә ике булып күренәсең.

- Үсәсезме?

- Үсәбез: тәбәнәк җиргә баш тия.

- Хәлләр ничек?

- Ал да гөл, калганын үзең бел.

- Хәлләр ничек?

- Алда гөл, артта кычыткан.

- Хәлләр ничек?

- Ат мөгезе кебек.

- Хәлләр ничек?

- Син сорама, мин әйтмим.

- Хәлләр ничек?

- Хәлләр бишни, сезнеке нишли?

- Хәлләр ничек?

- Хәлләр изге, тегеләр генә бизде.

- Хәлләр ничек?

- Хәлләр имин, кешегә тимим.

- Хәлләр ничек?

- Шөкерле-бөкерле, һаман бер төрле.

- Чибәрме?

- Чибәр: күрсәң гайрәтең чигәр.

- Читтә ничек соң?

- Читнең чите корсын.

- Шулаймы?

- Шулаен ул шулай да, ярый ла эш барып торса уңайга.

- Шуннан?

- Шуннан утырган да шуган, тауга түбән булган.

- Эш хакы күпме?

- Айга утыз көн, йокы үзеңнән.